ခေါင်ခေါင်

ပျော်ရွှင်ခြင်းအက်ဆေး

Published by ခေါင်ခေါင် under on Wednesday, November 17, 2010
ပျော်ရွှင်ခြင်းအက်ဆေး…
(၁)

လေထဲမှာပျံသန်းဖို့ဆိုတဲ့ ကျွန်မအတွေးတွေကို သူကဝေဖန်တယ်။ “ မင်းဟာက မဟုတ်တရုတ်တွေစဉ်းစားနေတာပဲ”.. “ မဟုတ်တရုတ်မဟုတ်ဘူး..” လို့ကျွန်မအေးအေးဆေးဆေး ပြန်ဖြေပါတယ်။ သူကဆက်ပြောတယ် “ ဒါကစိတ်စွဲလန်းမှုတစ်ခုပါ..ချစ်ရယ်.. မင်းအနေနဲ့ စိတ်တွေမလွတ်လပ်လို့ ထွက်ပေါက်ရှာချင်တာမျိုးပါ…”
ပင်လယ်ကမ်းစပ်မှာလဲလျောင်းနေရင်း ပင်လယ်စင်ရော်တွေကို..မြင်နေရတယ်..။ လေဟုန်စီးလိုက် ၊ ထိုးစိုက်ချလိုက်၊ ပျံဝဲလိုက် ၊ ကွေ့ပတ်လိုက်..နဲ့..။ ကျွန်မသာ.. ပင်လယ်စင်ရော်တစ်ကောင်ဖြစ်ခဲ့ရင်…။
“မင်းက လေထဲပျံသန်းနိုင်ပြီဆိုရင်တောင်.. ငါးတစ်ကောင်လို.. ပင်လယ်နက်ထဲမှာ.. မင်းရေကူးချင်အုံးမှာ..” သူကပြောပြန်တယ်။ “ မဟုတ်ပါဘူး.. ကျွန်မက လေထဲပျံသန်းဖို့ပဲ ပိုစိတ်ဝင်စားတာပါ”.. သူကျွန်မမျက်နှာကိုလှည့်ကြည့်ပြီးပြောတယ်.” မင်းက သိပ်လောဘကြီးတာပဲ… မင်းကိုပျော်ပျော်ရွှင်ရွှင် ဘယ်တော့များမှ တွေ့ရမှာလဲ”… ကျွန်မပြန်ဖြေခဲ့တယ်..” လေထဲမှာသာ ပျံသန်းနိုင်မယ်ဆိုရင်.. ကျွန်မသိပ်ပျော်မှာပါ..”
( ၂ )
“မင်းငိုနေတာလား..” သူကမေးတယ်။
“ မဟုတ်ပါဘူး..”
“ ဘာဖြစ်လို့ငိုတာလဲ ငါသိတယ်.. မင်းအမေကို သတိရလို့လား..”
“ မဟုတ်ပါဘူး.. “.. “ ဘာလို့မဟုတ်ရမှာလဲ…”…” မဟုတ်ပါဘူး ဆို..”
“ဒါဆိုမင်းလေထဲမှာမပျံသန်းနိုင်လို့..မဟုတ်လား.”.. ..
“ ကျွန်မငိုနေတာမဟုတ်ဘူး..” လို့.. ပြန်ဖြေလိုက်တယ်။
(၃)
ကျွန်မအတွက်ယူလာတဲ့ ကော်ဖီပန်းကန်ကို ငေးစိုက်ကြည့်နေမိတယ်။
“နေမကောင်းဘူးလား” လို့..သူကမေးတယ်။
“ ကောင်းပါတယ်” .. “ ဒါဆို.. ဘာလို့ မလှုပ်မယှက်ကော်ဖီပန်းကန်ကို စိုက်ကြည့်နေတာလဲ..”
“ ကျွန်မ ကော်ဖီမသောက်ချင်ဘူး..”
သူကျွန်မကို စိတ်ပျက်သလို တစ်ချက်ကြည့်တယ်။
“ လေထဲပျံသန်းဖို့ စဉ်းစားနေပြန်ပြီ.. ဟုတ်လား..”
“ မဟုတ်ပါဘူး.”
“ ဘာကို မဟုတ်ပါဘူးလဲ.. ငါသေချာပြောရဲတယ်။ မင်းဟာက ဒီလေထဲပျံဖို့လောက် တစ်ချိန်လုံးစဉ်းစားနေတယ်ဆိုတာ ငါအမြဲတမ်းသိတယ်နော်။ တစ်ဆိတ်အဲဒါကို ရပ်လိုက်ပါတော့.”
“ အင်းပါ..”
ခဏကြာတော့ သူထပ်ပြောပြန်တယ်..။
“မင်းအဲဒိကိစ္စကို စဉ်းစားနေပြန်ပြီလား.. ကိုယ့်ကို ရိုးရိုးသားသားပြော..”
“မဟုတ်ပါဘူး.. မစဉ်းစားပါဘူး”
“ ကိုယ့်ကိုဂတိပေး.. ဘယ်တော့မှ အဲဒိအကြောင်းတွေ မတွေးတော့ဘူးလို့..”
“ အင်းပါ.. ဂတိပေးတယ်..”
( ၄ )
“ ဒါကဘာကြီးလဲ” ကျွန်မဘေးနားမှာလာထိုင်ရင်း သူမေးတယ်။
“ ဒါက ရေပန့်..လေ”
“ ဟင်.. သူ့မှာ အတောင်ပံတွေနဲ့ပါလား..”
“ မဟုတ်ပါဘူး.. ဒါက ရေဒလက်တွေပါ.. ရေတွေကိုမတင်ဖို့လေ.. “
“ ကိုယ်ထင်တာတော့ ဒါပျံသန်းဖို့ကိစ္စနဲ့ပက်သက်ရမယ်.. ထင်တယ်..မင်းကျိန်ပြောရဲလား”
“ ဒါရေပန့်ပါ.. ကျွန်မကိုယုံပါ.”
“ ထားလိုက်ပါတော့.. ဘာပဲဖြစ်ဖြစ်ပေါ့.. ညနေစာစားလို့ရပြီ.. လာ..”
( ၅ )
အချိန်အတော်ကြာတဲ့အထိ ပျံသန်းဖို့ကိစ္စကို ကျွန်မတို့နှစ်ယောက်စလုံးမပြောဖြစ်ခဲ့ကြတော့ပါဘူး။ တစ်ည.သူနဲ့ကျွန်မ ပန်းကန်တွေအတူတူဆေးနေကြတုန်း.. အဲဒိကိစ္စကို သူအစဖော်ပြန်တယ်။
“ မင်းပြောတဲ့..ပျံသန်းဖို့ဆိုတဲ့.. ကိစ္စနဲ့တစ်ခုခုကိုများ.. တည်ဆောက်ပြီးပြီလား..”
“ အင်းပြီးပြီ.” ကျွန်မ ပြုံပြီး.. ပြန်ဖြေလိုက်တယ်။
“ ဒါဆို..မင်းဟာက လူဘယ်နှစ်ယောက်လောက် သယ်သွားနိုင်လဲ..”
“ကျွန်မတို့ ၂ ယောက်စလုံးကိုပေါ့… “
“ တစ်ကယ် ငါတို့ ၂ ယောက်လုံးကိုသယ်သွားနိုင်တယ်ပေါ့..”
“ ဟုတ်ပါ့ရှင်.. “.. သူ့မျက်နှာက.. ပျော်သွားပုံရတယ်။ ရုတ်တရက်.. သူကျွန်မပုခုံးကို.. လှမ်းပြီးဖက်ထားတယ်။ ဆပ်ပြာတွေပေနေတဲ့ လက်နဲ့ သူ့ခါးကို ကျွန်မပြန်ဖက်ထားလိုက်တယ်။
“ မင်းအဲဒါကြီးဆောက်ပြီးပြီဆိုရင်.. ငါ့ခွေးလေးအတွက်ရော. နေရာရှိပါ့မလားကွာ.”
“ ဘာလို့မရှိရမှာလဲ.. ရှင့်ခွေးအတွက်ဘာမှ စိတ်မပူနဲ့”
“ မင်းက တစ်ကယ်တော်တယ်..” လို့..သူကပြုံးရင်းပြောတယ်။
( ၆ )
ညက ကြယ်တွေအစုံအလင်နဲ့ ခမ်းနားနေပါတယ်။
“ ကဲ..ပြော.. ဘယ်နေရာကို သွားချင်လဲ..” လို့ကျွန်မမေးလိုက်တယ်။ သူက သူ့ရဲ ဦးထုပ်ကိုကောက်တပ်လိုက်ပြီး ခွေးကိုဆွဲခေါ်လိုက်တယ်။
“ ကိုယ်မသိဘူး..မင်းက ဘယ်နေရာကိုသွားချင်တာလဲ..”
“ဒီကမ္ဘာကြီးပေါ်က ရှင်သွားချင်တဲ့ ဘယ်နေရာဖြစ်ဖြစ်ပေါ့..”သူက ကျေနပ်စွာပြုံးရင်း.. “ကိုယ်တစ်ကိုကောင်းဆန်သလိုဖြစ်နေမှာပေါ့.. မင်းကဘယ်ကိုသွားချင်လဲပြော… “
သူ့မျက်ဝန်းတွေကို စိုက်ကြည့်ရင်း ကျွန်မပြောလိုက်တယ်..။
“ ရှင်နဲ့မခွဲရဘူးဆိုရင်.. ရှင်သွားချင်တဲ့ဘယ်နေရာဖြစ်ဖြစ် .ကျွန်မသွားချင်တယ်..”
သူက တစ်ချက်ရယ်ရင်း..
“ အင်း.. ဒါဆို.. ကိုယ်အမြဲတမ်းသွားချင်နေတဲ့နေရာက.. ဘိုနီယို ကျွန်းလေးဆီကိုပဲ.. “
“အိုခေ”.. ကျွန်မပြန်ဖြေလိုက်တယ်။
ကျွန်မကောင်းကင်ကြီးဆီကိုမော့ကြည့်လိုက်တယ်။ ပျံသန်းဖို့ရာအတွက် သိပ်ကောင်းတဲ့ညတစ်ညပဲ.။

ခေါင်ခေါင်

အမေ့အတွက်

Published by ခေါင်ခေါင် under on Saturday, January 10, 2009
ကျွန်မလည်း ကမ္ဘာပေါ်ရှိ သားသမီးများအားလုံး ကဲ့သို့ အမေအားသိပ်ချစ်သည်။ အားကိုးတွယ်တာသည်။ အမေပေးခဲ့သော ရှင်သန်မှုဘ၀တစ်ခုဖြင့် ရိုးသားစွာ ကြိုးစားရင်း ကျွန်မဘ၀အစိတ်အပိုင်းများအားလုံး အဆင်ပြေပြေအောင်မြင်စွာ ဖြတ်သန်းခဲ့ပါသည်။ ကျွန်မဘေးမှာ အမေဆိုသော သူရဲကောင်းတစ်ယောက်က ကျွန်မဘ၀လုံခြုံအောင်မြင်စေဖို့ အမြဲရှိနေပေးခဲ့သည်ပဲ..။

လူတစ်ကာ အံသြလောက်အောင် အမေနှင့်ကျွန်မ ကရုပ်ချင်းချွတ်စွပ်တူသည်။ အမေအသက်၂၀ လောက်က ဓါတ်ပုံများမှာ အခုကျွန်မပုံနှင့် တစ်ထပ်တည်း တစ်ပုံစံတည်း ..။ စိတ်ကလည်း အမေနှင့် တစ်သားတည်း..။ ခန္ဓာကိုယ်ဖွဲ့စည်းပုံ တွေးခေါ်ပုံ ပြောပုံဆိုပုံ ခံယူချက်.. အားလုံး. အမေ့အတိုင်း .. ။ အဘွား နှင့် အဒေါ်များ အမေ့သူငယ်ချင်းများ အားလုံးက စကားစပ်မိတိုင်းပြောကြသည် ..ကျွန်မလုပ်သမျှ အရာတိုင်းက အမေငယ်ငယ်က အတိုင်းဖြစ်ဖြစ်နေသောကြောင့်တဲ့…။ အံသြစရာမရှိ.. ကျွန်မက အမေမွေးထားသော အမေ့သမီးအရင်းခေါက်ခေါက်ပဲ..။ အမေနဲ့ တူနေတာ ဘာများဆန်းလို့လဲ..။


အမေကျွန်မဘေးမှာ အမြဲရှိခဲ့ပေးသည်။ အကူအညီ အကြံညာဏ်အမြဲပေးသည်။ ဘယ်တော့မှ တားဆီးပိတ်ပင်ခြင်းဆိုတာမရှိခဲ့..။ ကျွန်မဖြစ်ချင်သော အရာအားလုံး အဆင်ပြေပြေဖြစ်လာစေရန် အမြဲကူညီပေးသည်။ ကျွန်မအိပ်မက်များကို အတူကူမက်ပေးသည်.. အတူရင်ခုန်ပေးသည်။ အမေရှိသောကြောင့် ကျွန်မဘယ်အရာကိုမှ မကြောက်လန့်ခဲ့.. ။ အမေ့အားကိုးနှင့် ကျွန်မအမြဲစွတ်တိုးခဲ့တာ…။

ခုတော့ကျွန်မနားမှာ အမေမရှိ.. ဖုန်းခဏ ခဏခေါ်ရအောင်လည်း ကျွန်မအတွက် ဘက်ဂျက်က သိပ်အဆင်မပြေ…။ ဖြစ်နိုင်ရင်တော့ အမေ့အသံနေ့တိုင်းကြားချင်တာပါ.. အင်အားအပြည့်ပါတဲ့ အမေ့အသံ စူးစူးလေး ကြားလိုက်ရရင် ဘ၀အမောတွေ ကနေခဏပြေပျောက်သွား သလိုပဲ..။

ဒီနေ့တော့ ကျွန်မအမေကိုလွမ်းဆွတ်လွန်းလို့ ဖုန်းခေါ်ခဲ့သည်။ အမေ့အသံ ..အမေ့နှုတ်ဆက်သံမှာ ကျွန်မရင်တစ်ခုလုံးချိုမြသွားခဲ့ပါသည်..။
“ဟိတ်ကောင် .. ဒီအချိန်ကြီး… အိပ်မပျော်လို့လား.. နေမကောင်းဘူးလား.. “
“လွမ်းလို့..မေကြီး..ကို..”
…………………………….
……………………………
“ဒီနေ့အိမ်မှာ မုန့်ဟင်းခါ ချက်စားကြတာ . ငါ့သမီးကို သတိရလို့ မေကြီးမစားနိုင်ဘူး “
“သမီး အတွက် ဟင်းတွေ ထည့်ပေးလိုက်တယ်.. မနက်ဖြန်ရောက်လိမ့်မယ်”
“ဘာမှ စိတ်မညစ်နဲ့ . စိတ်ဆင်းရဲခံပြီး မနေနဲ့ ပြန်ချင်တဲ့ အချိန် .. အချိန်မရွေးကောက်ပြန်လာခဲ့”
“အလှုမှာ ငါ့သမီးအကြောင်းဝိုင်းမေးကြလို့ ပြောပြလိုက်တယ် နားတွေညည်းသွားကြမလား မသိဘူး….”
ဖုန်းထဲကနေ အမေမေးသမျှဖြေ အမေပြောတာတွေနားထောင် စိတ်ထဲရှိတာတွေ အမေ့ကိုလျှောက်ပြော.. ရင်းနဲ့ ကျွန်မရင်ထဲ မွန်းကျပ်ပိတ်လှောင်နေသမျှ ပြေလျော့သွားခဲ့ပါတယ်..။

အမေပေးခဲ့သော ဘ၀တစ်ခုဟာ .. အမေ့အတွက်ပဲဖြစ်သင့်တယ်လို့ ကျွန်မခံယူထားပါတယ်။ ကျွန်မရဲ့ အခုလက်ရှိဘ၀ …နောက်ထပ်ဖြစ်ဖို့ မျှော်မှန်းနိုင်သမျှ အားလုံးကလည်း ဒီအမေ့ကျေးဇူးတွေကြောင့်ပဲလေ..။
အချိန်တစ်ချိန်ရောက်ရင်တော့ ကျွန်မကို အရမ်းချစ်တဲ့ အမေ့နားကို အပြီးပြန်တော့မယ်….။ အမေ့နားမှာနေရတဲ့ဘ၀လောက် ငြိမ်းချမ်းတာ အရာရာ အဆင်ပြေတာမရှိလို့ပါပဲ..။

(ကမ္ဘာပေါ်ရှိအမေများအားလုံး ကျန်းမာပျှော်ရွင်ကြပါစေ)

စိတ်ကူးတွေထဲ..

Published by ခေါင်ခေါင် under on Wednesday, December 31, 2008
ဆရာအယ်ဂျယ်နဲ့မယ်ညီ ပေါင်းပြီး Tag တဲ့စိတ်ကူးတွေ အကြောင်းတဲ့..

စိတ်ကူးတွေယဉ်ကြည့်လိုက်ရရင်.......


ကျွန်မတို့ရဲ့အိမ်လေးက တောင်ကုန်းလေးတစ်ခုပေါ်မှာရှိတယ်။ တစ်ထပ်တိုက် အစိမ်းနုရောင်လေး.. အိမ်ရှေ့မှာ မြေနီလမ်းလေးတစ်ခုရှိတယ်.။ အိမ်ပေါ်ကနေကြည့်လိုက်ရင် မျက်စိတစ်ဆုံး ပန်းသီးပင်တန်းတွေ စတော်ဗယ်ရီခင်းတွေ အ၀ါရောင်နေကြာခင်းတစ်ခု ကော်ဖီခင်းတွေ နဲ့.ဟိုးခပ်ဝေးဝေးမှာ ထင်းရူးတောလည်းရှိတယ်။ မနက်ကျွန်မအိပ်ယာထထချင်း အခန်းထဲက ပြတင်းပေါက်ကို ဖွင့်လိုက်ရင် ခေါင်းရင်းဘက်မှာ ကျွန်မအတွက်သူစိုက်ပေးထားတဲ့ အဖြူရောင်နှင်းဆီပန်းခင်းတစ်ခင်းလည်းရှိတယ်။ အဲဒိနှင်းဆီရနံ့တွေကိုနမ်းရှိုက်ပြီး ကျွန်မနိုးလာမယ်။ အခန်းထဲကိုသူယူလာပေးတဲ့ မနက်စာကို အတူတူစားကြမယ်။ အရမ်းလှပသိမ်မွေ့တဲ့..မနက်ခင်းလေး...

ခဏနေလို့..သူအလုပ်ရှိရာထွက်သွားတဲ့ပြီး ကျွန်မတစ်ယောက်တည်းကျန်ခဲ့တဲ့အခါ နှင်းဆီဖြူခင်းထဲက ပန်းတွေခူး ဘုရားမှာလှု ဧည့်ခန်းမှာ ပန်းအိုးလှလှလေးထိုး.. ကမ္ဘာအပေါ်မှာ အရသာအရှိဆုံး ဟင်းတွေကို မီးဖိုတစ်ခုလုံးဗြောင်းဆန်အောင်ချက်. တစ်အိမ်လုံးကိုလည်း ကျွန်မစိတ်တိုင်းကျ သန့်ရှင်းတောက်ပြောင်နေအောင် အလှဆင်ရင်း သူပြန်လာမှာကိုစောင့်နေမယ်...။

သူပြန်လာတဲ့အခါ နေ့လည်စာအတူတူစားကြရင်း အလုပ်အကြောင်းတွေပြောကြမယ်.စားသောက်ပြီးခနတစ်ဖြုတ်နားပြီးရင်တော့ ကျွန်မတို့၂ ယောက်တည်းပိုင်တဲ့ စတူဒီယိုထဲ ၀င်ချင်ဝင်ကြမယ်.. သူကဂစ်တာတီး. ကျွန်မက ဒရမ်တီး..သူရေးထားတဲ့သီချင်းတွေ အတူတူဆိုကြမယ်။ မိန်းမဖြစ်ပြီး မော်ဒန်ရော့မှ ကြိုက်တဲ့ကျွန်မနဲ့ ယောက်ျားဖြစ်ပြီး ပေါ့သီချင်းအေးအေးလေးတွေသာကြိုက်တဲ့သူနဲ့ ရန်ဖြစ်ချင်ဖြစ်နေဦးမယ်။

ညနေစောင်းတွေမှာကျွန်မတို့နှစ်ယောက် ထင်းရူးတောဘက် လမ်းလျှောက်ထွက်ချင်ထွက်.. ပန်းသီးခင်းတွေထဲလျှောက်သွားချင်သွား အိမ်ရှေ့က ကော်ဖီပင်တွေနားမှာ ဘောလုံးဆင်းကန်ချင်ကန်.. ရာသီဥတုကောင်းတဲ့အခါ စက်ဘီးတစ်ယောက်တစ်စီးနဲ့ Moutain Bike သွားလုပ်ချင်လုပ်ကြဦးမယ်။

တစ်ခါတစ်ရံ ရိုမန်တစ်ညနေစာကို ဖယောင်းတိုင်လေးတွေထွန်းပြီး အတူတူခံစားကြ.. အရမ်းအေးတဲ့ညတွေမှာ မီးလင်းဖိုနားထိုင်ပြီး ကိုယ့်ခြံကထွက်တဲ့ ပန်းသီးဝိုင်လေးသောက်ရင်း အရင်တုန်းကအကြောင်းတွေပြန်ပြောကြ.... နဲ့ဘ၀ကချိုမြစွာ....

ကျွန်မတို့နှစ်ယောက်သာရှိသော ဒီကမ္ဘာလေးမှာ တစ်ယောက်ကိုတစ်ယောက်ထာဝရပိုင်ဆိုင်ထားလျက် ပျော်ရွှင်ငြိမ်းချမ်းသော ဘ၀လေးမှာ.ဘယ်တော့မှမခွဲဘဲ. တစ်သက်လုံး.....

( ကျေနပ်ပြီလား အယ်ဂျယ်နဲ့ မယ်ညီ ... :P )



အိမ်မက် မိုင်အဝေး........

Published by ခေါင်ခေါင် under on Saturday, December 27, 2008
ငါ့စိတ်နဲ့ခန္ဓာတောင်.. မညီညွတ်ဘူး..
အရူးတစ်ယောက်လို. လွတ်လွတ်ထွက်သွားတတ်တဲ့..ငါ
သိစိတ်က စေလွှတ်ရာမှာ...
မသိစိတ်က ဟိုး.တိမ်တွေထဲ.. မြူးထူးပျော်ပါး....
ငါ့ရင်ဘတ်တစ်ခြမ်းက
မသာယာတဲ့ တေးသီချင်းတွေသာ ဆိုညည်းနေတော့တယ်...
...ငါ့မျက်လုံးတွေမှိတ်ထားတယ်.....

လိုက်ခဲ့ပါဆိုတော့... ငြင်းဆန်တယ်
ဘယ်လိုရှင်းပြရမလဲ...
ဒီတစ်ခါ နွေရာသီပြန်ရောက်ရင်...
မင်းအိမ်မက်တွေထဲ ငါတစ်ကယ်ပြန်လာခဲ့တော့မယ်
အလင်းရောင်တွေနဲ့ဝေးပေမယ့်
ဒါဟာငါပိုင်ဆိုင်သမျှ ငါ့အကြောင်းပါပဲ..
အက်ကြောင်းတွေလည်း ထပ်လို့...
အပိုသက်သက်လို့ နင်ထင်ဦးမယ်...
..မကြားချင်တော့ရင်တော့..နင့်နားတွေ ပိတ်ထားလိုက်ပါ ...

ရူးမတတ်လွမ်းခဲ့ပါတယ်
ဟုတ်ရင်ဟုတ်မယ်......ဟုတ်နေတာပါပဲ
မင်းအမုန်းတွေကြား...
နားလည်မှုကိုကျောခိုင်းမသွားဖို့ပဲ..ငါဆုတောင်းတယ်
လက်တစ်ဆုပ်စာ အိမ်မက်လေးဆိုပေမယ့်
ငါ့ဘ၀ထက်ပို တန်ဖိုးထားခဲ့ပါတယ်..
နွေရာသီကိုပဲ ..စောင့်နေပါ...
တွဲထားတဲ့... လက်တစ်စုံကို မဖြုတ်ချပစ်ခဲ့ပါနဲ့...။



ကိုဂစ်တာ.. ခင်ဗျား ဖတ်ဖို့...

Published by ခေါင်ခေါင် under on Saturday, December 13, 2008
မတော်တဆ ခင်ဗျားအသဲကွဲနိုင်တယ်
သေချာတာတော့  ခေါင်ခေါင်နဲ့မသက်ဆိုင်ဘူး
ခင်ဗျား ပုံပြင်တွေနားထောင်ခဲ့လို့ဖြစ်ကောင်းဖြစ်နိုင်တယ်
ခင်ဗျားက တစ်စောက်ကန်းလေ..
ပုံပြင်ဆိုတာ တစ်ကယ်မဟုတ်မှန်း မဝေခွဲနိုင်အောင် ခင်ဗျားက ခပ်ညံ့ညံ့ပဲ..
မတော်တဆ ခင်ဗျားရူးသွားနိုင်တယ်
သေချာတာတော့ ခင်ဗျား ခေါင်ခေါင့် ကဗျာတွေလာဖတ်လို့မဟုတ်ဘူး
အချစ်ကို အရူးလိုကိုးကွယ်ခဲ့လို့ဖြစ်ကောင်းဖြစ်နိုင်တယ်
ခင်ဗျားကပြောရင် နားမ၀င်ဘူး..
အဲဒိအချစ်က ခင်ဗျားရေးတဲ့ ကဗျာတွေလောက်တောင် ဖတ်လို့မကောင်းဘူး..
(ဒီလိုပြောရင် ခင်ဗျားက အကြီးအကျယ် ငြင်းဦးမယ် )
မတော်တဆ ခင်ဗျားသေသွားနိုင်တယ်
သေချာတာတော့ ခေါင်ခေါင်နဲ့ ရန်ခဏခဏ ဖြစ်ရလို့မဟုတ်ဘူး
ခင်ဗျားစိတ်နဲ့ကိုယ်နဲ့သဟာဇာတမဖြစ်တော့လို့ဖြစ်ကောင်းဖြစ်နိုင်တယ်
ခင်ဗျားက ဒေါသကြီးတယ်လေ..
အစွဲအလန်းကြီးလွန်းတော့ ခင်ဗျားမြင်မကောင်းအောင် လူးလှိမ့်နေတာပေါ့....
မတော်တဆ ခင်ဗျားဟာ ခင်ဗျားပြန်ဖြစ်နိုင်တယ်
အချစ်ဆိုတာကို မယုံကြည်ပဲ ခင်ဗျားနေနိုင်တယ်
အသဲကွဲတဲ့အခါ အစားတွေမစားပဲ အရက်သောက်ပစ်နိုင်တယ်
အဖေနဲ့အဆင်မပြေရင် ၃ ရက်လောက်မအိပ်ပဲ နေနိုင်တယ်
ခင်ဗျားချစ်သူ အကြောင်းမစဉ်းစားပဲ ကဗျာတွေလှိမ့်ရေးနိုင်တယ်..။
စိတ်အစာမကျေရင် ခေါင်ခေါင်နဲ့ အော်ကြီးဟစ်ကျယ် ရန်ဖြစ်နိုင်တယ်။
ခင်ဗျားဟာ ..ခင်ဗျားပဲ...ကိုဂစ်တာ....
ဒီလိုပဲပေါ့ပေါ့ပါးပါးတွေးပါ....။ ။




10th ဒီဇင်ဘာ

Published by ခေါင်ခေါင် under on Monday, December 08, 2008
အချိန်တန်ရင်...
မင်းရောက်လာတော့မယ် ....10th ဒီဇင်ဘာ...

နှင်းတွေသုတ်လိမ်းထားတဲ့မျက်နှာလေးနဲ့အလှဆုံးပြုံးဦးမယ်...
ငါ့ရင်ခုန်သံတွေကို အတင်းလှုပ်နှိုးဦးမယ်
မရိုးနိုင်တဲ့ အိမ်မက်တွေနဲ့ နင်အစွမ်းကုန် ဖြားယောင်းဦးမယ်
ငါ့ရင်တွေကွဲကြေအောင် မျှော့်လင့်ချက်တွေ ပေးဦးမယ်
ငါ့ခံစားမှုတွေကို တော့လှောင်ရယ်ရယ်ဦးမယ်
ငါဒူးထောက်ဦးညွတ်တဲ့ အခါတစ်စိမ့်စိမ့်ကျေနပ်နေဦးမယ်

ဒီအချိန်ရောက်ရင်
ငါ့စိတ်တံခါးတွေ အကုန်ပိတ်ထားချင်တယ်..။
ဒီတစ်ကြိမ်လည်း...နင့်စိတ်ကြိုက်သာ စီရင်သွားပါ။
ငါကိုယ်တိုင်က နင်ဖတ်ဖို့အတွက်
ခါတော်မှီကဗျာတစ်ပုဒ် ဖြစ်နေခဲ့တာ...။ ။



အကြိုက်ဆုံးကဗျာ

Published by ခေါင်ခေါင် under on Saturday, December 06, 2008
ကိုလင်း ဒီပ ကတက်ဂ် တာပါ။ အကြိုက်ဆုံး ကဗျာလေး တဲ့..။ ကျွန်မကလဲ စာတွေကဗျာတွေ ဖတ်တာ.. ငယ်ငယ်တည်းက အရမ်းဝါသနာ ပါတော့ ကြိုက်မိတဲ့ ကဗျာတွေ စာတွေက လည်းအများကြီးပါပဲ။ လေးလုံးစပ် ကဗျာတွေက စလို့ပိုစ့်မော်ဒန်အထိ ဘဘမင်းသုဝဏ် ကစလို့ စိုင်းဝင်းမြင့် အထိ ကျွန်မလက်လှမ်းမီသမျှ ဖတ်ပါတယ်။

အကြိုက်ဆုံးကဗျာ ဆိုတော့ ကျွန်မ ဒီကဗျာလေးကိုပဲ ရေးဖို့သတိရတယ်..။ စိတ်ဓါတ်ကျလွယ်တဲ့ ကျွန်မ ဒီကဗျာလေးကိုဖတ်ပြီး ခဏခဏ အားတင်းရတယ်။ ကျွန်မရဲ့လက်ရှိဘ၀ နဲ့လည်းတိုက်ဆိုင်တယ်...။

ထိပ်ဆုံးသို့...
တစ်တောင်ပေါ် တစ်တောင်ဆင့်
တောင်အမြင့် ပတ်ခြံရံ
တစ်တောင်ဆုံး ပြန်တော့
တစ်လုံးကျန် ပြန်ပေသမို့
ဖန်ဖန်လေ အားအင်နိုးရတယ်
ကြိုးလျှောက်ရပြန်။

ခါတလေ တကယ်ပန်းတာကြောင့်
တော်ပါပြီ ဆက်မလှမ်းချင်ဘု
ရပ်တန့်း ရပ်မယ်ကြံ။

အမှန်တော့ ဖြစ်နိုင်ပါ့မလား
စခဲ့မိဟာပေါ့
တစ်နေ့မှာ ဆုံးရာရောက်ပါလိမ့်
အားလျှော့ကာ ဆုတ်ချင်စမ်းပါနဲ့
စိတ်နွမ်း အသာဖြေဦး။

မာလာငွေ ကန်ရေအေးရယ်နှင့်
ငှက်တေးကို အာရုံဆင်လို့
မူတသွင် အားအင်သစ်လိုက်ပေါ့
ချစ်ဖွယ်လူသား………။

( ရှင်မဟာရဌသာရ )

ဒီကဗျာလေးကလဲ ကျွန်မ နှလုံးသားထဲမှာ စွဲနေတာ...။

သင်သေသွားသော်....

သြော်...လူ့ပြည်လောက၊လူ့ဘ၀ကား
အိုရနာရသေရဦးမည်
မှန်ပေသည်တည့်။

သို့တပြီးကား၊ သင်သေသွားသော်
သင်ဖွားသောမြေ၊ သင်တို့မြေသည်
အခြေတိုးမြှင့် ကျန်ကောင်းသင့်၏။

သင်၏မျိုးသား၊ စာစကားလည်း
ကြီးပွားတက်မြင့်၊ ကျန်ကောင်းသင့်၏။

သင်ဦးချ၍ အမျှဝေရာ
စေတီသာနှင့် သစ္စာအရောင်
ဥာဏ်တန်ဆောင်လည်း
ပြောင်လျှက်ဝင်းလျှက်ကျန်စေသတည်း။

( ဇော်ဂျီ )


ကဗျာ ၂ ပုဒ်စလုံး အဓိပ္ပာယ်အပြည့် ရှိသလို နားလည်လွယ်အောင် ရိုးရှင်းပါတယ်..။
အားမာန် အပြည့်လဲ ရှိတယ်နော်...။

ဘလော့ပေါ်မှာ ဆိုရင်လဲ.. ကျွန်မဖတ်မိသမျှထဲမှာ.. ကိုလင်းဒီပ.. ရဲ့ကဗျာ ချိုအေးအေးတွေ ... ကျွန်မကြိုက်တယ် ( ငါ့ပန်းအိုးမှာ ထိုးခွင့်မရတဲ့ နှင်းဆီ) ကို တော်တော်ကြိုက်တယ်။ ကိုအိုင်လွယ်ပန် နဲ့ ကိုတင့်ထူးရွှေတို့ ရဲ့ ကဗျာတွေကိုလဲ ကြိုက်တယ်..။ ကိုဒီပ ပြောသလို ကဗျာဆိုတာ တီးလုံးထည့်မထားတဲ့ သီချင်းတွေပါပဲ..။ ကျွန်မတို့ နှလုံးသားနဲ့ လွပ်လပ်စွာ ဆိုညည်းနိုင်တယ်..။ ကျွန်မအတွက်လဲ ကဗျာဆိုတာ.. အချစ်ဦးပါပဲ.. ။ အချစ်ဦးကို ဘယ်သူက မေ့လို့ရမှာလဲ...နော်။ ။


( ဒီပိုစ့်လေး အတွက် ကျွန်မကို တစ်ကူးတစ်က တက်ဂ် တဲ့ကိုဒီပ ကိုကျေးဇူးအထူးပါ။ တစ်လက်စတည်း.. အကြောင်းတစ်ခုကြောင့် ကျွန်မ စီဘုံးကို ဖြုတ်ထားလိုက်တဲ့အကြောင်း အသိပေးချင်ပါတယ်ရှင့်။ ဖြုတ်လိုက် ပြန်တပ်လိုက်နဲ့ အားလုံးလဲ ကျွန်မကို တော်တော်မျက်စိနောက်နေပြီထင်ပါတယ်။ ကျွန်မဘလော့ မောင်နှမတွေထဲက ကျွန်မကို တစ်ခုခု ပြောခဲ့ချင်တာ အသိပေးချင်တာ ဆဲချင်တာများရှိရင် ကွန်မန့်မှာ စိတ်ကြိုက်ရေးခဲ့နိုင်ပါတယ်..။ ကျွန်မ မသိသော.. ကျွန်မကိုထိခိုက်ပြီး မလိုလားအပ်သော ကွန်မန့်များကိုတော့ ကျွန်မ ဖျက်ပစ်မှာ ဖြစ်ပါတယ်ရှင့်။ စီဗုံး အတွက်... သူငယ်ချင်း ငါးလေး နှင့် ပိစိ တို့အား ကျေးဇူးကမ္ဘာ.. )

ချစ်ခြင်းများဖြင့်..
ခေါင်ခေါင်

 

Lipsum

Followers