ပင်လယ်အညှို့ခံ ရတဲ့ညနေ...

နာရီပေါင်းဘယ်လောက်ကြာမှန်း မသိအောင် ကျွန်မ ဒီနေရာမှာ မတ်တပ်ရပ်နေခဲ့တယ်။ လေတွေက အရပ်ရှစ်မျက်နှာကနေ တစ်ရပ်စပ် တိုက်နေခဲ့လို့ ကျွန်မဆံပင်တွေ ကပုံပျက်ပန်းပျက် ဖွာလန်ကျဲနေပြီ။ ဒီနေရာမှာ မိန်းမတစ်ယောက် ကြာမြင့်စွာ ငြိမ်သက်တိတ်ဆိတ်ငေးမော နေခြင်းက ဘယ်သူ့အတွက်မှ အံသြစရာ တော့မကောင်းပါ။ ကျွန်မရှေ့က ပင်လယ်ရဲ့ အနားသတ်လေး မှာ ၀င်လုဆဲဆဲနေရောင်ရဲ့ အ၀ါရောင် တွေဖြာထွက်နေတယ်။ အ၀ါရောင်တွေရဲ့ ညှို့တတ်တဲ့ အလင်းတွေနဲ့ နောက်ခံ ကောင်းကင် ရဲ့ နက်ရှိုင်းသော အပြာရောင်တို့ တစ်ခုနှင့်တစ်ခု ပြင်းအားချင်း ဆန့်ကျင်နေကြတယ်။

ဒီနေရာမှာ မျက်စိတစ်ဆုံး နက်ရှိုင်းကျယ်ပြန့်ကြီးမားတဲ့ ကြောက်စရာ ပင်လယ်ပြင်ကြီးကို မျက်တောင်မခတ်ငေးမောနေနိုင်တယ်။ အဲဒီမျက်လုံးတွေမှာ မျက်ရည်တွေ အိုင်ထွန်းလိမ့်ဆင်း ကျနေရင်တောင် ဘယ်သူမှ ဂရုမစိုက်မိနိုင်ဘူး။ ဒီနေရာက ရှိရှိသမျှ သူတွေအားလုံး ကိုယ့်သီးသန့်ကမ္ဘာထဲမှာ ကိုယ့်စိတ်ကြိုက် နေထိုင်နိုင်ကြတယ်။ ကျွန်မကိုယ်တိုင်လဲ လွမ်းဆွတ်အားငယ်ခြင်း ဆိုတဲ့ သီးသန့်ကမ္ဘာထဲမှာ ဖြတ်တောက်နှောက်ယှက်မယ့်သူမရှိ အကြာကြီး လွတ်လပ်စွာ လွင့်မျောနေခဲ့ပြီးပြီ။

ကျွန်မရဲ့ရှေ့တည့်တည့် ပင်လယ်ပြင်ကြီးရဲ့ ဟိုးအဝေးမိုင်ပေါင်ထောင်ချီတဲ့ နေရာလေး တစ်ခုမှာကျွန်မရဲ့အိမ်ကျန်ခဲ့တယ်။ ကျွန်မကိုနွေးထွေးစွာ ချစ်ခင်ကြင်နာယုယ တတ်တဲ့ မောင်နှမတွေကျန်ခဲ့တယ်။ ကျွန်မမျက်နှာကို အရိပ်တစ်ကြည့်ကြည့် အကဲခတ်ပြီး လိုအပ်သမျှ စိတ်ဓါတ်ခွန်အားတွေ ပေးတတ်တဲ့ ကျွန်မရဲ့ အမေကျန်ခဲ့တယ်။ ကျွန်မကို ကူညီစာနာ နားလည်ပေးပြီး ကျွန်မဘက်က ရပ်တည်ပေးတတ်တဲ့ သူငယ်ချင်းတွေ ကျန်ခဲ့တယ်။ အခု ကျွန်မအနားမှာတော့ ကြောက်စရာ ကောင်းတဲ့ပင်လယ်ပြင်ကြီးနဲ့ သူစိမ်းဆန်တဲ့လူတွေ..... ။

ကျွန်မအိမ်ပြန်ချင်ပြီ။ ကျွန်မလာခဲ့တဲ့ နေရာတစ်ခုကိုအပြီးပြန်သွားချင်ပြီ။ ဒီပင်လယ်ဆီကိုရောက်တိုင်း ကျွန်မအိမ်ပြန်ချင်တယ်။

ပင်လယ်ဟာ အိမ်ပြန်ချင်တဲ့ ကျွန်မကို အစွမ်းကုန် ညှို့ယူနေတယ်။