ခေါင်ခေါင်

စိတ်ကူးတွေထဲ..

Published by ခေါင်ခေါင် under on Wednesday, December 31, 2008
ဆရာအယ်ဂျယ်နဲ့မယ်ညီ ပေါင်းပြီး Tag တဲ့စိတ်ကူးတွေ အကြောင်းတဲ့..

စိတ်ကူးတွေယဉ်ကြည့်လိုက်ရရင်.......


ကျွန်မတို့ရဲ့အိမ်လေးက တောင်ကုန်းလေးတစ်ခုပေါ်မှာရှိတယ်။ တစ်ထပ်တိုက် အစိမ်းနုရောင်လေး.. အိမ်ရှေ့မှာ မြေနီလမ်းလေးတစ်ခုရှိတယ်.။ အိမ်ပေါ်ကနေကြည့်လိုက်ရင် မျက်စိတစ်ဆုံး ပန်းသီးပင်တန်းတွေ စတော်ဗယ်ရီခင်းတွေ အ၀ါရောင်နေကြာခင်းတစ်ခု ကော်ဖီခင်းတွေ နဲ့.ဟိုးခပ်ဝေးဝေးမှာ ထင်းရူးတောလည်းရှိတယ်။ မနက်ကျွန်မအိပ်ယာထထချင်း အခန်းထဲက ပြတင်းပေါက်ကို ဖွင့်လိုက်ရင် ခေါင်းရင်းဘက်မှာ ကျွန်မအတွက်သူစိုက်ပေးထားတဲ့ အဖြူရောင်နှင်းဆီပန်းခင်းတစ်ခင်းလည်းရှိတယ်။ အဲဒိနှင်းဆီရနံ့တွေကိုနမ်းရှိုက်ပြီး ကျွန်မနိုးလာမယ်။ အခန်းထဲကိုသူယူလာပေးတဲ့ မနက်စာကို အတူတူစားကြမယ်။ အရမ်းလှပသိမ်မွေ့တဲ့..မနက်ခင်းလေး...

ခဏနေလို့..သူအလုပ်ရှိရာထွက်သွားတဲ့ပြီး ကျွန်မတစ်ယောက်တည်းကျန်ခဲ့တဲ့အခါ နှင်းဆီဖြူခင်းထဲက ပန်းတွေခူး ဘုရားမှာလှု ဧည့်ခန်းမှာ ပန်းအိုးလှလှလေးထိုး.. ကမ္ဘာအပေါ်မှာ အရသာအရှိဆုံး ဟင်းတွေကို မီးဖိုတစ်ခုလုံးဗြောင်းဆန်အောင်ချက်. တစ်အိမ်လုံးကိုလည်း ကျွန်မစိတ်တိုင်းကျ သန့်ရှင်းတောက်ပြောင်နေအောင် အလှဆင်ရင်း သူပြန်လာမှာကိုစောင့်နေမယ်...။

သူပြန်လာတဲ့အခါ နေ့လည်စာအတူတူစားကြရင်း အလုပ်အကြောင်းတွေပြောကြမယ်.စားသောက်ပြီးခနတစ်ဖြုတ်နားပြီးရင်တော့ ကျွန်မတို့၂ ယောက်တည်းပိုင်တဲ့ စတူဒီယိုထဲ ၀င်ချင်ဝင်ကြမယ်.. သူကဂစ်တာတီး. ကျွန်မက ဒရမ်တီး..သူရေးထားတဲ့သီချင်းတွေ အတူတူဆိုကြမယ်။ မိန်းမဖြစ်ပြီး မော်ဒန်ရော့မှ ကြိုက်တဲ့ကျွန်မနဲ့ ယောက်ျားဖြစ်ပြီး ပေါ့သီချင်းအေးအေးလေးတွေသာကြိုက်တဲ့သူနဲ့ ရန်ဖြစ်ချင်ဖြစ်နေဦးမယ်။

ညနေစောင်းတွေမှာကျွန်မတို့နှစ်ယောက် ထင်းရူးတောဘက် လမ်းလျှောက်ထွက်ချင်ထွက်.. ပန်းသီးခင်းတွေထဲလျှောက်သွားချင်သွား အိမ်ရှေ့က ကော်ဖီပင်တွေနားမှာ ဘောလုံးဆင်းကန်ချင်ကန်.. ရာသီဥတုကောင်းတဲ့အခါ စက်ဘီးတစ်ယောက်တစ်စီးနဲ့ Moutain Bike သွားလုပ်ချင်လုပ်ကြဦးမယ်။

တစ်ခါတစ်ရံ ရိုမန်တစ်ညနေစာကို ဖယောင်းတိုင်လေးတွေထွန်းပြီး အတူတူခံစားကြ.. အရမ်းအေးတဲ့ညတွေမှာ မီးလင်းဖိုနားထိုင်ပြီး ကိုယ့်ခြံကထွက်တဲ့ ပန်းသီးဝိုင်လေးသောက်ရင်း အရင်တုန်းကအကြောင်းတွေပြန်ပြောကြ.... နဲ့ဘ၀ကချိုမြစွာ....

ကျွန်မတို့နှစ်ယောက်သာရှိသော ဒီကမ္ဘာလေးမှာ တစ်ယောက်ကိုတစ်ယောက်ထာဝရပိုင်ဆိုင်ထားလျက် ပျော်ရွှင်ငြိမ်းချမ်းသော ဘ၀လေးမှာ.ဘယ်တော့မှမခွဲဘဲ. တစ်သက်လုံး.....

( ကျေနပ်ပြီလား အယ်ဂျယ်နဲ့ မယ်ညီ ... :P )



အိမ်မက် မိုင်အဝေး........

Published by ခေါင်ခေါင် under on Saturday, December 27, 2008
ငါ့စိတ်နဲ့ခန္ဓာတောင်.. မညီညွတ်ဘူး..
အရူးတစ်ယောက်လို. လွတ်လွတ်ထွက်သွားတတ်တဲ့..ငါ
သိစိတ်က စေလွှတ်ရာမှာ...
မသိစိတ်က ဟိုး.တိမ်တွေထဲ.. မြူးထူးပျော်ပါး....
ငါ့ရင်ဘတ်တစ်ခြမ်းက
မသာယာတဲ့ တေးသီချင်းတွေသာ ဆိုညည်းနေတော့တယ်...
...ငါ့မျက်လုံးတွေမှိတ်ထားတယ်.....

လိုက်ခဲ့ပါဆိုတော့... ငြင်းဆန်တယ်
ဘယ်လိုရှင်းပြရမလဲ...
ဒီတစ်ခါ နွေရာသီပြန်ရောက်ရင်...
မင်းအိမ်မက်တွေထဲ ငါတစ်ကယ်ပြန်လာခဲ့တော့မယ်
အလင်းရောင်တွေနဲ့ဝေးပေမယ့်
ဒါဟာငါပိုင်ဆိုင်သမျှ ငါ့အကြောင်းပါပဲ..
အက်ကြောင်းတွေလည်း ထပ်လို့...
အပိုသက်သက်လို့ နင်ထင်ဦးမယ်...
..မကြားချင်တော့ရင်တော့..နင့်နားတွေ ပိတ်ထားလိုက်ပါ ...

ရူးမတတ်လွမ်းခဲ့ပါတယ်
ဟုတ်ရင်ဟုတ်မယ်......ဟုတ်နေတာပါပဲ
မင်းအမုန်းတွေကြား...
နားလည်မှုကိုကျောခိုင်းမသွားဖို့ပဲ..ငါဆုတောင်းတယ်
လက်တစ်ဆုပ်စာ အိမ်မက်လေးဆိုပေမယ့်
ငါ့ဘ၀ထက်ပို တန်ဖိုးထားခဲ့ပါတယ်..
နွေရာသီကိုပဲ ..စောင့်နေပါ...
တွဲထားတဲ့... လက်တစ်စုံကို မဖြုတ်ချပစ်ခဲ့ပါနဲ့...။



ကိုဂစ်တာ.. ခင်ဗျား ဖတ်ဖို့...

Published by ခေါင်ခေါင် under on Saturday, December 13, 2008
မတော်တဆ ခင်ဗျားအသဲကွဲနိုင်တယ်
သေချာတာတော့  ခေါင်ခေါင်နဲ့မသက်ဆိုင်ဘူး
ခင်ဗျား ပုံပြင်တွေနားထောင်ခဲ့လို့ဖြစ်ကောင်းဖြစ်နိုင်တယ်
ခင်ဗျားက တစ်စောက်ကန်းလေ..
ပုံပြင်ဆိုတာ တစ်ကယ်မဟုတ်မှန်း မဝေခွဲနိုင်အောင် ခင်ဗျားက ခပ်ညံ့ညံ့ပဲ..
မတော်တဆ ခင်ဗျားရူးသွားနိုင်တယ်
သေချာတာတော့ ခင်ဗျား ခေါင်ခေါင့် ကဗျာတွေလာဖတ်လို့မဟုတ်ဘူး
အချစ်ကို အရူးလိုကိုးကွယ်ခဲ့လို့ဖြစ်ကောင်းဖြစ်နိုင်တယ်
ခင်ဗျားကပြောရင် နားမ၀င်ဘူး..
အဲဒိအချစ်က ခင်ဗျားရေးတဲ့ ကဗျာတွေလောက်တောင် ဖတ်လို့မကောင်းဘူး..
(ဒီလိုပြောရင် ခင်ဗျားက အကြီးအကျယ် ငြင်းဦးမယ် )
မတော်တဆ ခင်ဗျားသေသွားနိုင်တယ်
သေချာတာတော့ ခေါင်ခေါင်နဲ့ ရန်ခဏခဏ ဖြစ်ရလို့မဟုတ်ဘူး
ခင်ဗျားစိတ်နဲ့ကိုယ်နဲ့သဟာဇာတမဖြစ်တော့လို့ဖြစ်ကောင်းဖြစ်နိုင်တယ်
ခင်ဗျားက ဒေါသကြီးတယ်လေ..
အစွဲအလန်းကြီးလွန်းတော့ ခင်ဗျားမြင်မကောင်းအောင် လူးလှိမ့်နေတာပေါ့....
မတော်တဆ ခင်ဗျားဟာ ခင်ဗျားပြန်ဖြစ်နိုင်တယ်
အချစ်ဆိုတာကို မယုံကြည်ပဲ ခင်ဗျားနေနိုင်တယ်
အသဲကွဲတဲ့အခါ အစားတွေမစားပဲ အရက်သောက်ပစ်နိုင်တယ်
အဖေနဲ့အဆင်မပြေရင် ၃ ရက်လောက်မအိပ်ပဲ နေနိုင်တယ်
ခင်ဗျားချစ်သူ အကြောင်းမစဉ်းစားပဲ ကဗျာတွေလှိမ့်ရေးနိုင်တယ်..။
စိတ်အစာမကျေရင် ခေါင်ခေါင်နဲ့ အော်ကြီးဟစ်ကျယ် ရန်ဖြစ်နိုင်တယ်။
ခင်ဗျားဟာ ..ခင်ဗျားပဲ...ကိုဂစ်တာ....
ဒီလိုပဲပေါ့ပေါ့ပါးပါးတွေးပါ....။ ။




10th ဒီဇင်ဘာ

Published by ခေါင်ခေါင် under on Monday, December 08, 2008
အချိန်တန်ရင်...
မင်းရောက်လာတော့မယ် ....10th ဒီဇင်ဘာ...

နှင်းတွေသုတ်လိမ်းထားတဲ့မျက်နှာလေးနဲ့အလှဆုံးပြုံးဦးမယ်...
ငါ့ရင်ခုန်သံတွေကို အတင်းလှုပ်နှိုးဦးမယ်
မရိုးနိုင်တဲ့ အိမ်မက်တွေနဲ့ နင်အစွမ်းကုန် ဖြားယောင်းဦးမယ်
ငါ့ရင်တွေကွဲကြေအောင် မျှော့်လင့်ချက်တွေ ပေးဦးမယ်
ငါ့ခံစားမှုတွေကို တော့လှောင်ရယ်ရယ်ဦးမယ်
ငါဒူးထောက်ဦးညွတ်တဲ့ အခါတစ်စိမ့်စိမ့်ကျေနပ်နေဦးမယ်

ဒီအချိန်ရောက်ရင်
ငါ့စိတ်တံခါးတွေ အကုန်ပိတ်ထားချင်တယ်..။
ဒီတစ်ကြိမ်လည်း...နင့်စိတ်ကြိုက်သာ စီရင်သွားပါ။
ငါကိုယ်တိုင်က နင်ဖတ်ဖို့အတွက်
ခါတော်မှီကဗျာတစ်ပုဒ် ဖြစ်နေခဲ့တာ...။ ။



အကြိုက်ဆုံးကဗျာ

Published by ခေါင်ခေါင် under on Saturday, December 06, 2008
ကိုလင်း ဒီပ ကတက်ဂ် တာပါ။ အကြိုက်ဆုံး ကဗျာလေး တဲ့..။ ကျွန်မကလဲ စာတွေကဗျာတွေ ဖတ်တာ.. ငယ်ငယ်တည်းက အရမ်းဝါသနာ ပါတော့ ကြိုက်မိတဲ့ ကဗျာတွေ စာတွေက လည်းအများကြီးပါပဲ။ လေးလုံးစပ် ကဗျာတွေက စလို့ပိုစ့်မော်ဒန်အထိ ဘဘမင်းသုဝဏ် ကစလို့ စိုင်းဝင်းမြင့် အထိ ကျွန်မလက်လှမ်းမီသမျှ ဖတ်ပါတယ်။

အကြိုက်ဆုံးကဗျာ ဆိုတော့ ကျွန်မ ဒီကဗျာလေးကိုပဲ ရေးဖို့သတိရတယ်..။ စိတ်ဓါတ်ကျလွယ်တဲ့ ကျွန်မ ဒီကဗျာလေးကိုဖတ်ပြီး ခဏခဏ အားတင်းရတယ်။ ကျွန်မရဲ့လက်ရှိဘ၀ နဲ့လည်းတိုက်ဆိုင်တယ်...။

ထိပ်ဆုံးသို့...
တစ်တောင်ပေါ် တစ်တောင်ဆင့်
တောင်အမြင့် ပတ်ခြံရံ
တစ်တောင်ဆုံး ပြန်တော့
တစ်လုံးကျန် ပြန်ပေသမို့
ဖန်ဖန်လေ အားအင်နိုးရတယ်
ကြိုးလျှောက်ရပြန်။

ခါတလေ တကယ်ပန်းတာကြောင့်
တော်ပါပြီ ဆက်မလှမ်းချင်ဘု
ရပ်တန့်း ရပ်မယ်ကြံ။

အမှန်တော့ ဖြစ်နိုင်ပါ့မလား
စခဲ့မိဟာပေါ့
တစ်နေ့မှာ ဆုံးရာရောက်ပါလိမ့်
အားလျှော့ကာ ဆုတ်ချင်စမ်းပါနဲ့
စိတ်နွမ်း အသာဖြေဦး။

မာလာငွေ ကန်ရေအေးရယ်နှင့်
ငှက်တေးကို အာရုံဆင်လို့
မူတသွင် အားအင်သစ်လိုက်ပေါ့
ချစ်ဖွယ်လူသား………။

( ရှင်မဟာရဌသာရ )

ဒီကဗျာလေးကလဲ ကျွန်မ နှလုံးသားထဲမှာ စွဲနေတာ...။

သင်သေသွားသော်....

သြော်...လူ့ပြည်လောက၊လူ့ဘ၀ကား
အိုရနာရသေရဦးမည်
မှန်ပေသည်တည့်။

သို့တပြီးကား၊ သင်သေသွားသော်
သင်ဖွားသောမြေ၊ သင်တို့မြေသည်
အခြေတိုးမြှင့် ကျန်ကောင်းသင့်၏။

သင်၏မျိုးသား၊ စာစကားလည်း
ကြီးပွားတက်မြင့်၊ ကျန်ကောင်းသင့်၏။

သင်ဦးချ၍ အမျှဝေရာ
စေတီသာနှင့် သစ္စာအရောင်
ဥာဏ်တန်ဆောင်လည်း
ပြောင်လျှက်ဝင်းလျှက်ကျန်စေသတည်း။

( ဇော်ဂျီ )


ကဗျာ ၂ ပုဒ်စလုံး အဓိပ္ပာယ်အပြည့် ရှိသလို နားလည်လွယ်အောင် ရိုးရှင်းပါတယ်..။
အားမာန် အပြည့်လဲ ရှိတယ်နော်...။

ဘလော့ပေါ်မှာ ဆိုရင်လဲ.. ကျွန်မဖတ်မိသမျှထဲမှာ.. ကိုလင်းဒီပ.. ရဲ့ကဗျာ ချိုအေးအေးတွေ ... ကျွန်မကြိုက်တယ် ( ငါ့ပန်းအိုးမှာ ထိုးခွင့်မရတဲ့ နှင်းဆီ) ကို တော်တော်ကြိုက်တယ်။ ကိုအိုင်လွယ်ပန် နဲ့ ကိုတင့်ထူးရွှေတို့ ရဲ့ ကဗျာတွေကိုလဲ ကြိုက်တယ်..။ ကိုဒီပ ပြောသလို ကဗျာဆိုတာ တီးလုံးထည့်မထားတဲ့ သီချင်းတွေပါပဲ..။ ကျွန်မတို့ နှလုံးသားနဲ့ လွပ်လပ်စွာ ဆိုညည်းနိုင်တယ်..။ ကျွန်မအတွက်လဲ ကဗျာဆိုတာ.. အချစ်ဦးပါပဲ.. ။ အချစ်ဦးကို ဘယ်သူက မေ့လို့ရမှာလဲ...နော်။ ။


( ဒီပိုစ့်လေး အတွက် ကျွန်မကို တစ်ကူးတစ်က တက်ဂ် တဲ့ကိုဒီပ ကိုကျေးဇူးအထူးပါ။ တစ်လက်စတည်း.. အကြောင်းတစ်ခုကြောင့် ကျွန်မ စီဘုံးကို ဖြုတ်ထားလိုက်တဲ့အကြောင်း အသိပေးချင်ပါတယ်ရှင့်။ ဖြုတ်လိုက် ပြန်တပ်လိုက်နဲ့ အားလုံးလဲ ကျွန်မကို တော်တော်မျက်စိနောက်နေပြီထင်ပါတယ်။ ကျွန်မဘလော့ မောင်နှမတွေထဲက ကျွန်မကို တစ်ခုခု ပြောခဲ့ချင်တာ အသိပေးချင်တာ ဆဲချင်တာများရှိရင် ကွန်မန့်မှာ စိတ်ကြိုက်ရေးခဲ့နိုင်ပါတယ်..။ ကျွန်မ မသိသော.. ကျွန်မကိုထိခိုက်ပြီး မလိုလားအပ်သော ကွန်မန့်များကိုတော့ ကျွန်မ ဖျက်ပစ်မှာ ဖြစ်ပါတယ်ရှင့်။ စီဗုံး အတွက်... သူငယ်ချင်း ငါးလေး နှင့် ပိစိ တို့အား ကျေးဇူးကမ္ဘာ.. )

ချစ်ခြင်းများဖြင့်..
ခေါင်ခေါင်

မွေးနေ့..ဆုတောင်း..

Published by ခေါင်ခေါင် under on Thursday, December 04, 2008


(ကိုဂျဲ အတွက်...... မွေးနေ့လက်ဆောင် Hamster တစ်ကောင်.... )



တစ်ခါတစ်ရံမှာ.. ဒီဇင်ဘာ ၅ ရက်နေ့ဆိုတာ...
သောကြာနေ့ဖြစ်ခဲ့တယ်။...
ငါယုံကြည်တာကတော့ အနူးညံ့ဆုံး နှလုံးသွေးစက်တွေက
သူ့ရင်ထဲက အမှန်တရားတွေရဲ့ တစ်စိတ်တစ်ပိုင်းပဲနေလိမ့်မယ်။
ငါတို့အားလုံးအတွက်တော့ သူဟာ သူရဲကောင်းတစ်ယောက်ပဲ..
ငြိမ်းချမ်းချိုမြိန်ခြင်းတွေ..သာသူဆောင်ယူလာပေးတတ်တယ်..။
ငါတို့ရဲ့အမှားတွေကို နားလည်စွာ ခွင့်လွှတ်တယ်...။
ငါတို့ရဲ့ ဆိုးနွဲ့မှုတွေကို.. အပြုံးနဲ့မသိဟန်ဆောင်တယ်...။
ငါတို့ရဲ့ နာကျင်မှု တွေကို နွေးထွေးစွာ မျှဝေခံစားတယ်...။
ငါတို့ရဲ့ ဒဏ်ရာတွေကို ဖြေဖြောက်နှစ်သိမ့်ပေးတယ်...။
ဘာပဲဖြစ်ဖြစ် သူဟာငါတို့ရဲ့အစ်ကိုဖြစ်နေတာကို..ကျေနပ်တယ်..။
ငြိမ်းချမ်းပါစေ. အဆင်ပြေသာယာပါစေ..။
ချောမွေ့အနှောက်အယှက် ကင်းသော ဘ၀လမ်းကို
ခပ်ပိန်းပိန်းမလေးနဲ့ အတူလျှောက်ခွင့်ရပါစေ...။
မျှော်လင့်အိမ်မက်သောအရာအားလုံး အပိုင်ရပါစေ....။
ဒါဟာ..ကဗျာမဆန်တဲ့ မွေးနေ့ဆုတောင်း တစ်ခုဖြစ်ချင်ဖြစ်မယ်...။
တစ်ခါတစ်ရံ..ဒီဇင်ဘာ ၅ ရက်နေ့ဆိုတာ...
သောကြာနေ့...ဖြစ်နေခဲ့တယ်...။

ခေါင်ခေါင်



ကြွားပြီ

Published by ခေါင်ခေါင် under on Wednesday, December 03, 2008
အန်တီမမ၀ါ ကကျွန်မကို ကြွားခိုင်းတယ်။ အကြွားပိုစ့်ရေးခိုင်းတယ်။ တက်ဂ် တစ်ကာ့တက်ဂ် ထဲမှာ ကျွန်မအတွက် ရေးဖို့အခက်ခဲဆုံး တက်ဂ်ပါပဲ။ ဟုတ်တယ်လေ.. ကျွန်မမှာ ဘာမှကြွားစရာလဲမရှိဘူး။ မမ၀ါကတော့ ဖိနပ်တွေ အကြောင်းရေးတယ်။ အရမ်းလှတာပဲ ဖိနပ်တွေ..။ များလွန်းလို့ ဖိနပ်ဆိုင်တောင် ဖွင့်လို့ရလောက်တယ်..။ ကျွန်မကတော့. ဖိနပ်ဆိုလဲ ဝေါ့ကင်းရှုး တစ်ရံ ၊ အလုပ်သွားရင် စီးတဲ့ဖိနပ်တစ်ရံနဲ့ အကြမ်းစီးတဲ့ တစ်ရံသာပိုင်ဆိုင်တယ်။ ဝေါ့ကင်းရှုးကလွဲပြီးလဲ ကျန်တဲ့ဖိနပ်တွေ ကျွန်မမကြိုက်သလို စီးလဲမစီးဖြစ်ဘူး။ အ၀တ်အစားဆိုလဲ တီရှပ် နဲ့ ဂျင်းသာ ကြုံသလိုစွပ်ပြီးသွားတဲ့သူ..။ အ၀တ်အစားလဲ ကြွားလောက်စရာ များများစားစားမရှိ ..။ မိတ်ကပ်လဲ တစ်ခါမှ မလိမ်းဖြစ်သလို အလှပြင်ပစ္စည်းတွေလဲ ကျွန်မမှာ မရှိပါ။ ကျွန်မမှာ ကြွားဖို့တော်တော် ဒုက္ခရောက်တယ်..။ ဒါပေမယ့် မမ၀ါကို ချစ်တော့လည်း ကြံဖန်ပြီး ကြွားလိုက်ပါတယ်။



အရုပ်ကလေး တွေချစ်ဖို့ကောင်းတယ် နော်။ ကျွန်မပိုင်သမျှ အကုန်ပဲ ..။ ယုံချင်ယုံ မယုံချင်နေ.. ကျွန်မအရုပ်တွေ မချစ်တတ်ဘူး။ တစ်ကယ်မချစ်တာ..။ ဈေးကြီးလို့လဲ ကျွန်မ မ၀ယ်နိုင်ပါဘူး ...။ ဒါတွေ အကုန် လက်ဆောင်ရထားတဲ့ အရုပ်တွေပါ။ သူများပေးတဲ့ လက်ဆောင် ကိုတန်ဖိုးထားတတ်တော့.. သေသေချာချာ တော့သိမ်းထားပါတယ် ။ ကြွားစရာ ဒီအရုပ်တွေပဲ များများစားစားရှိတယ်။ ကျန်တာတော့ ဘာမှမရှိဘူး..။ မမ၀ါ ကျေနပ်တော့နော်...ကြွားလို့ပြီးပြီ.... မမ၀ါရဲ့ဖိနပ်တွေထဲက တစ်ရံလောက်ပေးလေ... နော်...ဟီး.. :P


 

Lipsum

Followers